Выбух на Пінскай дрэваапрацоўчай фабрыцы: ёсць ахвяры

Паводле папярэдняй інфармацыі, падарваўся цэх ДСП, гараць складскія бункеры.

Дым ад падпаленай фабрыкі можна ўбачыць практычна з кожнага кутка горада.

Людзі, якія прыехалі да прахадной фабрыкі, паведамляюць аб наяўнасці ахвяр, за якімі пад’язджаюць адна за адной машыны «хуткай дапамогі».

На тэрыторыю фабрыкі не пускаюць журналістаў і тэлеаператараў.

Як паведаміў прэс-сакратар Міністэрства па надзвычайных сітуацыях Віталь Навіцкі, на дадзены момант вядома, што выбух адбыўся ў вытворчым цэху Пінскай дрэваапрацоўчай фабрыкі. Адбыўся абвал перакрыцця, плошча абвалу — каля 100 кв. метраў.

МНС афіцыйна пакуль паведамляе, што адзін чалавек загінуў, 9 пацярпелі. Аднаго працоўнага падраздзяленні МНС выцягвалі з-пад завалаў.

У той жа час жыхары Пінска паведамляюць, што лік загінулых значна большы.

Прычына выбуху высвятляецца.