Авіякатастрофа ў Кітаі

У час катастрофы кітайскага пасажырскага самалёта ў аэрапорце горада Ічунь загінула 43 чалавекі, паведамляюць інфармагенцтвы са спасылкай на кітайскае тэлебачанне.

Паводле дадзеных прадстаўнікоў грамадзянскай авіяцыі КНР, праз моцны туман самалёт Embraer E-190 кампаніі Henan Airlines прамахнуўся міма ўзлётна-пасадачнай паласы і ўпаў за кіламетр ад яе. У выніку крушэння адбылося ўзгаранне. Загінулі 43 чалавекі, выжыць удалося 53 пасажырам. Паводле дадзеных паліцыі, ужо знойдзены целы ўсіх загінуўшых. Пацярпелыя, у якіх пераломы і апёкі, шпіталізаваныя.

Усяго на борце знаходзілася 96 чалавек.

Інцыдэнт здарыўся ўчора каля 22.10 па мясцовым часе (17.10 па беларускім часе). Самалёт ляцеў у Ічунь з Харбіна. Гэтыя гарады знаходзяцца ў правінцыі Хэйлунцзян.

Аэрапорт у Ічуні адкрыўся ў верасні мінулага года.