Пры рэстаўрацыі Оперы ў Мінску скралі 6 млрд рублёў

Упраўленне дэпартамента фінансавых расследаванняў КДК па Мінску расследуе крымінальную справу аб злоўжываннях пры рэстаўрацыі Вялікага тэатра оперы і балета.

Як паведаміў на прэс‑канферэнцыі 9 лютага ў Мінску начальнік упраўлення працэсуальнага кантролю і методыкі расследавання злачынстваў ДФР КДК Ігар Шаціла, крымінальная справа была распачата ў лістападзе 2009 года ў дачыненні да дырэктара аб’яднанай дырэкцыі будаваных аб’ектаў.

Чыноўнік са студзеня 2006 года па май 2009 года пры ажыццяўленні работ па рэстаўрацыі і рэканструкцыі будынка Вялікага тэатра оперы і балета неабгрунтавана, без дакументальнага пацвярджэння атрымаў з бюджэту кампенсацыю для папаўнення расходаў, панесеных пры пастаўцы на аб’ект абсталявання ў памеры амаль 6 млрд. рублёў.