«Белтэлекам» пашырыў знешні інтэрнет-шлюз у расійскім напрамку на 10 Гбіт/с. Цяпер сумарная ёмістасць шлюза складае 47 Гбіт/с — 41 Гбіт/с у расійскім напрамку і 6 Гбіт/с — у еўрапейскім.

Конкурс «Белтэлекама» на закупку паслуг магістральнага доступу ў інтэрнет (расійскі сегмент) выйграла расійская кампанія «Сінтэра». Яна арганізавала для беларускага партнёра доступ да сеткі на мяжы Расіі і Беларусі. Шырыня новага канала складае 10 Гбіт/с.

Супрацоўніцтва «Сінтэры» і «Белтэлекама» пачалося ў 2009 годзе, калі кампаніі арганізавалі міжсеткавае ўзаемадзеянне на базе трансгранічнага пераходу. Затым у 2010 годзе «Сінтэра» стала пастаўшчыком доступу ў расійскі сегмент інтэрнет, даўшы першы канал прапускной здольнасцю на 10 Гбіт/с. Пасля падпісання новага кантракта сумарная канальная ёмістасць, якая арганізуецца «Сінтэрай» для «Белтэлекама», складае 20 Гбіт/с.

«Белтэлекам» быў створаны 3 ліпеня 1995 года. З’яўляецца першасным інтэрнет-правайдэрам у Беларусі, ажыццяўляе перадачу даных па камутуемай сетцы агульнага карыстання, забяспечвае доступ да міжнародных і беларускіх рэсурсаў інтэрнета, дае ў карыстанне міжнародныя лічбавыя патокі і каналы практычна любой ёмістасці, забяспечвае роўныя ўмовы работы аператараў мабільнай сувязі Беларусі шляхам падключэння іх да міжнароднай станцыі, дае міжгародні і міжнародны роўмінг. Абаненцкая база кампаніі — больш як 3,8 млн.