У Беларусі не плануецца забараняць торэнты

У Беларусі не збіраюцца забараняць торэнты — файлаабменныя рэсурсы. Пра гэта паведаміў у час online канферэнцыі на сайце газеты «СБ — Беларусь Сегодня» супрацоўнік Аператыўна-аналітычнага цэнтра пры прэзідэнце Беларусі Сяргей Краўцоў.

«Сам па сабе файлаабменны рэсурс — гэта адзін з відаў абмену інфармацыяй, — адзначыў Сяргей Краўцоў. — Яго ніхто не забараняў і забараняць не збіраецца».

Прадстаўнік ААЦ прапануе разглядаць пытанне ў іншай плоскасці — у сферы аховы аўтарскіх правоў. «Калі ўласнік рэсурсу не выконвае патрабаванні заканадаўства аб ахове аўтарскіх правоў, то ён нясе адказнасць ва ўстаноўленым парадку, — падкрэсліў Сяргей Краўцоў. — У выпадку заявы праваўладальніка аб парушэнні яго аўтарскіх правоў, уладальнік рэсурсу павінен адрэагаваць і абмежаваць распаўсюджванне названай інфармацыі». У адваротным выпадку да яго можа быць прад’яўлены пазоў у судовым парадку асобай, аўтарскае права якой парушана.

У распрацоўцы ўказа №60 прымалі ўдзел прадстаўнікі 22 дзяржаўных органаў, адзначыў спецыяліст. Пад увагу таксама браліся прапановы і заўвагі інтэрнэт-супольнасці, пастаўшчыкоў інтэрнэт-паслуг і інш.

Указ нумар 60 «Аб мерах па ўдасканаленню выкарыстання нацыянальнага сегмента сеткі Інтэрнэт» падпісаны 1 лютага 2010 года. Дакументам прадугледжаны абавязак дзяржаўных органаў і дзяржаўных арганізацый размяшчаць інфармацыю аб сваёй дзейнасці на афіцыйных сайтах, забяспечваць іх эфектыўнае функцыянаванне і сістэматычнае абнаўленне. Інтэрнэт-карыстальнікі змогуць свабодна і бязвыплатна атрымліваць інфармацыю аб рэжыме работы дзяржаўнага органа (іншай арганізацыі), паштовым адрасе, нумарах тэлефонаў яго даведачных службаў, парадку работы са зваротамі грамадзян і юрыдычных асоб, аб ажыццяўляемых адміністрацыйных працэдурах і інш.