На мінулым тыдні адна з раніц для аграрыяў СВК “Свіцязянка-2003” распачалася з карыснай і актуальнай інфармацыі, якая датычылася ўсіх і кожнага. З самага ранку на мехмайстэрнях гаспадаркі прайшоў Дзень здароўя, падчас якога спецыялісты Карэліцкага раённага цэнтра гігіены і эпідэміялогіі закранулі важныя пытанні прафілактыкі захворванняў і здаровага ладу жыцця.
Адным з першых з карыснымі парадамі да работнікаў гаспадаркі звярнуўся загадчык Райцаўскай амбулаторыі ўрача агульнай практыкі Мікалай Іванавіч Клімко, які нагадаў усім прысутным аб неабходнасці кантраляваць свой артэрыяльны ціск.
– 130/80 – аптымальныя лічбы артэрыяльнага ціску згодна з сучаснымі нормамі, – адзначыў Мікалай Клімко. – Калі гэты паказчык вашага здароўя павялічаны, ні ў якім разе не займайцеся самалячэннем. Абавязкова звяртайцеся да ўрача, які правільна вызначыць дазіроўку неабходных лекаў. Для работнікаў сельгаспрадпрыемстваў раёна застаюцца актуальнымі захворванні апорна-рухальнага апарату, што звязана ў першую чаргу са статыстычнай нагрузкай на ўвесь арганізм падчас працы на сельскагаспадарчай тэхніцы.
– За 7 месяцаў бягучага года на тэрыторыі Карэліцкага раёна зарэгістравана 8 выпадкаў шаленства, – адзначыла валеолаг Карэліцкай райЦГЭ Людміла Іванаўна Валасевіч, якая расказала ўсім прысутным аб небяспецы кантактаў з хворымі жывёламі. – Калі вас пакусаў сабака, у той жа дзень абавязкова звяртайцеся ў медыцынскую ўстанову за неабходнай дапамогай.
Праведзены Дзень здароўя ў СВК “Свіцязянка-2003” супаў з праваслаўным святам Мядовы Спас. Менавіта таму выступленне памочніка ўрача-гігіеніста Вольгі Аляксандраўны Гіга было поўнасцю прысвечана карысным уласцівасцям мёда і неабходнасці яго ўжывання.
– Мёд – сапраўдная панацэя для здароўя чалавека, бо ён умацоўвае імунітэт і паляпшае мазгавую актыўнасць, аказвае бактэрыцыднае ўздзеянне, лечыць раны і апёкі, – адзначыла Вольга Гіга. – Ужыванне адной – дзвюх сталовых лыжак мёду штодзень дастаткова, каб забяспечыць арганізм чалавека амаль усімі неабходнымі мікраэлементамі.
Падчас сустрэчы са спецыялістамі райЦГЭ работнікі сельгаспрадпрыемства не толькі пачулі вялікую колькасць карыснай інфармацыі, але, запоўніўшы прапанаваныя анкеты, змаглі адказаць на важнае для кожнага пытанне: “Ці дастаткова ўвагі я ўдзяляю свайму здароўю?”
Аксана ЯНУШ
Фота аўтара