Лукашэнка: Беларусь будзе перапрацоўваць казахстанскую нафту

Беларусь на сваіх НПЗ будзе перапрацоўваць казахстанскую нафту, заявіў Аляксандр Лукашэнка 2 снежня перад вылетам з Астаны ў Мінск у інтэрв’ю журналістам.

Адказваючы на пытанне аб двухбаковым супрацоўніцтве Беларусі і Казахстана, у прыватнасці, энергетычнага супрацоўніцтва, беларускі лідар сказаў: «Калі ласка, з вялікім задавальненнем».

«І нафтапрадукты пасля яе перапрацоўкі на нашых заводах разам з вамі будзем пастаўляць на еўрапейскі, расійскі, беларускі, украінскі рынкі»,

— цытуе беларускага кіраўніка прэс-служба прэзідэнта Беларусі.

Лукашэнка адзначыў, што паміж дзвюма краінамі існуе звыш 30 сумесных праектаў. У большасці сваёй гэта праекты, якія рэалізуюцца на тэрыторыі Казахстана.