Сямашка: Беларусі выгадней купляць венесуэльскую нафту

Беларусі больш выгадна купляць венесуэльскую нафту, чым расійскую са стапрацэнтнай пошлінай.

Пра гэта паведаміў 28 лістапада ў эфіры тэлеканала ОНТ першы намеснік прэм"ер-міністра Беларусі Уладзімір Сямашка.

«Мне часта журналісты задаюць пытанне: а навошта праз акіян, праз некалькі мораў цягаць гэту нафту?

Гэта ж напэўна будзе даражэй. Я не магу сказаць усё, але трэба адзначыць, што нам больш выгадна купляць венесуэльскую нафту, чым расійскую са стапрацэнтнай пошлінай», - сказаў Уладзімір Сямашка.

Паводле яго слоў, тое, што чыгуначны транспарт замяняецца на трубаправодны,

дае магчымасць з кожнай тоны атрымліваць дадаткова да $30.

«Гэта можна супаставіць з той нормай прыбытку нашых заводаў - Мазырскага НПЗ, Наваполацкага НПЗ, які яны сёння зарабляюць пры перапрацоўцы нафты, які патрэбны для жыццядзейнасці завода. Гэта вялікая лічба - $30 на тоне», - адзначыў першы намеснік прэм"ер-міністра.