Замежныя чыпсы падаражаюць

У Беларусі чыпсы выключаны з пераліку тавараў з прымяненнем зніжанай стаўкі ПДВ. Аляксандр Лукашэнка падпісаў указ № 526 «Аб унясенні змяненняў ва ўказ прэзідэнта Рэспублікі Беларусь ад 21 чэрвеня 2007 г. № 287».

Як паведамляе прэс-служба прэзідэнта, змяненні ва ўказ № 287, які вызначае падаткаабкладанне харчовых тавараў і тавараў для дзяцей, унесеныя ў сувязі з тым, што з 6 ліпеня 2010 года, згодна з Дагаворам аб Мытным кодэксе Мытнага саюза, тэрыторыі Беларусі, Казахстана і Расіі складаюць адзіную мытную тэрыторыю Мытнага саюза.

У адпаведнасці з новым указам прадугледжана выключэнне з пераліку харчовых тавараў і тавараў для дзяцей, па якіх прымяняецца зніжаная стаўка падатку на дададзены кошт у памеры 10% пры іх увозе на мытную тэрыторыю Беларусі і (ці) пры рэалізацыі на тэрыторыі краіны, зацверджанага ўказам № 287, бульбы, нарэзанай тонкімі лустачкамі, абсмажанай ці падсушанай, салёнай ці несалёнай, араматызаванай ці неараматызаванай, у герметычных упакоўках.

Гаворка ідзе пра бульбяныя чыпсы, якія ў адпаведнасці з патрабаваннямі санітарных норм, правілаў і гігіенічных нарматываў забароненыя для дзіцячага харчавання.