У Беларусі пачалася масавая ўборка збожжа
Як паведамляе Міністэрства сельскай гаспадаркі і харчавання, па стане на 20 ліпеня збожжавыя і зернебабовыя сабраныя з 260,7 тыс. га, што склала 10,7% пасяўных плошчаў. Гаспадаркі намалацілі 814 тысяч тон збожжа пры сярэдняй ураджайнасці 31,3 цэнтнера з гектара.
Па тэмпах уборкі ўраджаю лідзіруе Гомельская вобласць, дзе намалочана каля 300 тысяч тон збожжа. Найбольшы паказчык ураджайнасці зафіксаваны ў Гродзенскай вобласці — 40,8 ц/га.
Усяго збожжавымі і зернебабовымі культурамі ў Беларусі засеяна 2 млн. 437 тыс. га.Сёлета ставіцца задача сабраць 10 млн. тон збожжавых. Летась ураджай збожжавых склаў каля 9 млн. тон.
Разам з уборачнай кампаніяй працягваюцца працы і па нарыхтоўцы травяных кармоў. Аграрыі ўжо нарыхтавалі 3 млн. 524,1 тыс. тон кармавых адзінак, ці 55,4% задання. У цэлым па краіне нарыхтавана 1 млн. 47,2 тыс. тон сена (88,8% плана), 9 млн. 652,1 тыс. тон сенажу (108,9%), 1 млн. 505,4 тыс. тон сіласу (9,6%).
Аляксандр Лукашэнка мае намер асабіста інспектаваць ход уборачнай кампаніі. Пра гэта ён заявіў 7 ліпеня, прымаючы са справаздачай старшыняў Брэсцкага і Гомельскага аблвыканкамаў. Прэзідэнт паставіў задачу правесці ўборку ў максімальна сціслыя тэрміны.
"Важна не прапусціць момант і пачаць уборку адразу, як толькі гэта стане магчымым. Гэта абумоўлена, у першую чаргу, умовамі надвор"я, якія не дазваляюць губляць час. Хлеб добры, і яго трэба сабраць своечасова і без страт", — сказаў прэзідэнт.
Наведваючы на мінулым тыдні Гомельскую вобласць, Лукашэнка запатрабаваў ад кіраўніцтва Мінсельгасхарча распачаць масавую ўборку збожжавых не пазней за 20 ліпеня.
БелаПАН