Беларусь папярэджвае інвестараў пра рызыкі, звязаныя з РФ

Беларусь папярэджвае патэнцыйных інвестараў, якія прымуць удзел у яе дэбютным выпуску еўрааблігацый, пра тое, што адной з ключавых рызыкаў у рамках дадзенага размяшчэння становяцца нестабільныя адносіны паміж Мінскам і Масквой.

«Пагаршэнне адносін Беларусі з Расіяй можа негатыўна паўплываць на пастаўкі энерганосьбітаў Беларусі і расійскія інвестыцыі ў Беларусь, што можа аказаць адмоўнае ўздзеянне на беларускую эканоміку», — цытуе Reuters папярэдні праспект еўрабондаў Беларусі, датаваны 9 ліпеня.

У копіі дакумента, што паступіў у распараджэнне агенцтва, цэлых сем старонак тэксту прысвечаныя апісанню рызык, звязаных з інвеставаннем ў Беларусь. «Інвеставанне ў рынкі, якія развіваюцца, накшталт Беларусі, спалучана з высокай ступенню рызыкі, і інвестары павінны асабліва старанна падыходзіць да ацэнкі гэтых рызык», — гаворыцца ў дакуменце.

У прыватнасці, у ім адзначаецца, што беларуская эканоміка характарызуецца «вузкай экспартнай базай, залежнасцю ад імпарту, дэфіцытамі бюджэту і плацежнага балансу, нізкімі валютнымі рэзервамі, апорай на знешняе фінансаванне і зменлівым палітычным, эканамічным, сацыяльным, прававым і нарматыўным асяроддзем».

На гэтым тыдні прадстаўнікі Беларусі пачалі серыю сустрэч з інвестарамі ў Еўропе напярэдадні першага для краіны размяшчэння еўрааблігацый. Мінск плануе выпусціць еўрабонды на суму да 1 млрд дал. Арганізатарамі размяшчэння выступаюць BNP Paribas, Deutsche Bank, Royal Bank of Scotland і Ашчадбанк Расіі. Усяго ў 2010—2011 гг. Беларусь можа заняць на знешніх рынках да 2 млрд дал.