Беларускі бок патрабуе склікаць пленум Эканамічнага суда

Міністэрства юстыцыі абскардзіла рашэньне калегіі Эканамічнага суда СНД, якім адхілена хадайніцтва аб часовай забароне (да разгляду спрэчкі) на спагнаньне Расеяй мыта на нафтапрадукты, якія пастаўляюцца ў краіну. Беларускі бок нязгодны з гэтым рашэньнем і настойвае на скліканьні пленума суду.Пра гэта паведамляе афіцыйны сайт Міністэрства юстыцыі. 

Спагнаньне мыта Расеяй закранае інтарэсы больш чым 70 прадпрыемстваў абедзьвюх краін і прыносіць шкоду каапэрацыйным сувязям. Таму Мінюст просіць суд склікаць пленум і разгледзець заяву ўрада Беларусі аб прыпыненьні спагнаньня Расеяй мыта на нафтапрадукты да канчатковага разгляду пытаньня ў судзе.

Міністэрства юстыцыі лічыць мэтазгодным прасіць суд правесьці пасяджэньне пленума ў магчыма кароткія тэрміны. Яно запрасіла на пленум кіраўнікоў арбітражных судоў усіх краінаў СНД.

21 красавіка калегія Эканамічнага суда СНД прыняла ў вытворчасьць пазоў беларускага ўраду да ўраду Расеі, каб адмяніць уведзенае Расеяй ад 1 студзеня гэтага года мыта на нафтапрадукты, якія пастаўляюцца ў Беларусь. Судовае пасяджэньне калегіі па гэтым пытаньні прызначана на 7 верасьня.