У літаратурнай гасцёўні прыняла ўдзел вядомая паэтка Марыя Кобец

«Літаратурная гасцёўня «Каб агменьчык у сэрцах не згас…» стала значнай падзеяй для творчай групы настаўнікаў беларускай мовы і літаратуры, вучняў і настаўнікаў Плешчыцкай сярэдняй школы», — расказала карэспандэнту pinsknews.by метадыст раённага вучэбна-метадычнага кабінета Святлана Кахновіч.

Усім удзельнікам выпаў гонар сустрэцца і пагутарыць са знакамітай паэтэсай, нашай зямлячкай Марыяй Уладзіміраўнай Кобец.

Сустрэча з вядомай паэткай падаравала прысутным яркія ўражанні, усе адчулі непарыўную сувязь пісьменніцы з роднай зямлёй, малой радзімай. Мерапрыемства атрымалася вельмі шчырым і запамінальным.

«Сэрцам гарачым» любіць Марыя Кобец свой край, сваіх землякоў – так сімвалічна і была названа кніжная выстава па яе творчасці. Вельмі кранула ўсіх прэзентацыя па творах Марыі Уладзіміраўны «Пад крылaмі аблокаў палескі мой край». З пачуццём вялікай любові да свайго роднага  Палесся і беларускай мовы прачыталі вершы вучні Плешчыцкай СШ. Пяшчота і сардэчная прачуласць гучала ў вытанчаных радках пра каханне, якія падрыхтавалі вучні. У выкананні Насці Палюховіч, Яны Шчаснай і настаўніцы беларускай мовы і літаратуры В.Р. Есько прагучала песня на верш Марыі Кобец «А бэз даўно ўжо адцвіў». І ў ролі кампазітараў выступілі самі дзеці.

Сапраўдным падарункам для ўсіх прысутных сталі вершы ў выкананні Марыі Кобец. У яе радках, шчырых, кранальных, усе адчулі вялікую любоў да сваёй малой радзімы, гонар за родную мову. Падчас сустрэчы прысутныя атрымалі асалоду ад вершаў, напоўненых подыхам вечнасці і трапяткім імгненнем нашых дзён, поклічам сівой даўніны, хараством роднай прыроды і чысцінёй душэўных памкненняў.

Марыя Уладзіміраўна прадставіла свой літаратурны праект «Пад адным сонцам». І загучаў верш «Сонца» на розных мовах свету, паказваючы моўнае багацце краін і народнасцяў,  спрабуючы аб’яднаць людзей усяго свету. Пошукам агульначалавечага шчасця пранізаны радкі верша.

Верш Марыі Кобец «Сонца»
пераведзены больш чым
на трыццаць моў свету

Напрыканцы сустрэчы прысутныя адзначылі, што прыкладам свайго асабістага жыцця і сваёй творчасцю Марыя Уладзіміраўна вучыць маладое пакаленне жыць паўнавартасным змястоўным жыццём, берагчы сваю родную мову, паважаць бацькоў, сваю сям’ю. Рабіць толькі дабро, несці людзям любоў і спагаду, быць карысным для іх. Умець запаліць агменьчык у душах тых, хто абяссілеў…