«Світанкаўцы» запрасілі сяброў на творчую імпрэзу
16 студзеня на базе аддзела абслугоўвання і інфармацыі раённай бібліятэкі Шаркаўшчынскай ЦБС прайшла прэзентацыя брашуры вершаў “світанкаўцаў” “Зімовым вечарам”. Вядучай імпрэзы была рэдактар народнага літаратурна-музычнага аб’яднання «Світанак» Галіна Паніч. У гэты дзень усе прысутныя атрымалі магчымасць здзейсніць паэтычнае падарожжа ў свет натхнення і атрымаць асалоду ад сустрэчы з сябрамі.
Да прысутных звярнулася кіраўнік аб’яднання “Світанак” Ала Міхайлава:
— Віншую вас з выхадам новай брашуры вершаў. Жадаю вам далейшага творчага натхнення. І сёння хачу прадставіць нашых новых сяброў, якія папоўняць рады народнага літаратурна-музычнага аб’яднання “Світанак”. Знаёмцеся, кампазітары шаркаўшчынскага краю — Іван Гарбачонак і Ірына Буднік. Трэба адзначыць, што акрамя паэтаў і пісьменнікаў у нашым раёне яшчэ ёсць таленавітыя кампазітары, якія пішуць музыку на свае, а таксама на вершы нашых паэтаў. Тым самым яны ўслаўляюць наш край. Так, як гэта робяць Іван і Ірына. Вельмі прыемна, што яны далучыліся да нашага калектыву.
Ірына Буднік і Іван Гарбачонак рассказалі пра сябе, чым займаюцца і што іх натхняе. Далей прысутныя змаглі здзейсніць вандроўку ў свет музыкі. Да ўвагі гледачоў Ірына падрыхтавала сваю аўтарскаю песню “Матуліна яблынька”, а Іван — музыкальную кампазіцыю да аднаго з вершаў Міледзія Кукуця.
Затым прайшла відэапрэзентацыя новай брашуры. Пасля чаго нашы паэты змаглі рассказаць пра сваю творчасць: калі пачалі пісаць свае першыя вершы, што іх натхняла. Большасць з іх зачыталі ўласныя вершы або іх урыўкі. Кожны адказаў на пытанні і выказаў сваю думку пра літаратурныя дасягненні аб’яднання. Ігар Дземідовіч, Віктар Лагун і Міледзій Кукуць у выступленні падкрэслілі сэнсавую значнасць і беларускамоўнасць твораў.
Атрымалася сустрэча сапраўды блізкіх людзей, якія разумеюць і зычліва ставяцца адзін да аднаго.
У завяршэнні мерапрыемства Галіна Паніч падзякавала пісьменнікам за цікавую і змястоўную гаворку і выказала спадзяванне, што ў гэтым годзе споўніцца яе мара і адбудзецца творчая сустрэча “світанкаўцаў” з латвійскімі паэтамі.
Алена АНАНІЧ.
