Купалле з "Ганнай". Як на беразе возера пад Віцебскам адзначылі старажытнае народнае свята
На беразе возера Сосна пад Віцебскам увечары 6 ліпеня адзначылі старажытнае народнае свята Купалле.
Мерапрыемства прайшло ў пасёлку Доўжа — на тэрыторыі кавярні «Прыазёрны двор «У Ганны». Арганізавалі яго прафкам «Віцебскай бройлернай птушкафабрыкі» і адміністрацыя Віцебскага раёна.
Каб госці маглі дабрацца да месца святкавання, з Віцебска пусцілі бясплатны аўтобус. На ўваходзе людзей сустракаў народны аркестр з гармонікам і бубнам. Тут жа майстрыхі прапаноўвалі набыць сплеценыя вянкі. Аднак купальскае ўпрыгожанне можна было зрабіць і на свой густ — трохі далей стаяў воз з палявымі кветкамі.
Потым наведнікаў свята чакалі розныя забавы, гульні і атракцыёны. На сцэне ішла «Купальская казка», якая збольшага складалася з беларускага фальклору.
Затым пачалося інтэрактыўнае прадстаўленне — за ўдзел у гульнях і віктарынах на тэмы народных традыцый гледачоў частавалі іржаным кісялём.
А дзясятай вечара запалілі вялікае купальскае вогнішча.