Фіналісты "Заспявай 2.0" Symphorine выступяць разам з Leibonik

31 ліпеня ў дворыку на плошчы Свабоды, 4 выступіць гурт Symphorine, а госцем будзе пераможца ў намінацыі "Дэбют" на прэміі "Героі году-2014" – гурт Сяргея Башлыкевіча Leibonik. 

Гурт Symphorine удзельнічаў у конкурсе "Заспявай 2.0" адразу ў дзвюх намінацыях. У намінацыі "Паэзія" яны прадставілі песню "Наперад" на верш Віктара Лупасіна, якая аказалася першай аўтарскай кампазіцыяй каманды. А на "Кавер" была пададзена свая версія песні Лявона Вольскага "Госці", дзякуючы якой музыкі і прайшлі ў фінал конкурсу.



У Symphorine уваходзяць прафесійныя музыкі, лаўрэаты разнастайных міжнародных і рэспубліканскіх конкурсаў. Узрост музыкаў 22-26 год. Спецыялізуюцца яны якраз на выкананнях сусветных кавераў ва ўласных аранжыроўках. Стаўку робяць на скрыпку і віяланчэль разам з яркімі галасамі салістак Марыны Вярэніч і Ганны Дашкевіч пад акампанімэнт кантрабаса, клавішных і ўдарных. Дзяўчыны сведчаць, што іх выступ нікога не пакідае абыякавым.

Нікога ніколі не пакідае абыякавым і Сяргей Башлыкевіч, які разам з сваім гуртом Leibonik летась атрымаў прэмію "Героі году" у намінацыі "Дэбют". 31 ліпеня музыкі сыграюць сэт з сваіх найлепшых песень. Башлыкевіч мае багата ўласных кампазіцый, але таксама вельмі любіць граць каверы, прычым адаптуе іх пад беларускія рэаліі. Пэўна галоўны хіт Leibonik – песня "О Купала" ёсць пераасэнсаваннем знакамітага поп-гіта "Rock Me Amadeus" Falco.



Па выніку летніх канцэртаў маладых выканаўцаў будуць вызначаныя пераможцы конкурсу "Заспявай 2.0", які праводзіць партал Tuzin.fm і фонд "Вяртанне" пры падтрымцы кампаніі "Будзьма беларусамі!". Прызавы фонд конкурсу складае 1 тыс еўра.