Кнігу ад Шушкевіча прэзентавалі ў Брэсце

Сваю новую кнігу пад назвай "Маё жыццё, крах і ўваскрошанне СССР" былы старшыня Вярхоўнага савета РБ Станіслаў Шушкевіч прадставіў удзельнікам нефармальнай сустрэчы.

Ініцыятыва правядзення такой прэзентацыі належала незалежнаму прафсаюзу работнікаў радыёэлектроннай прамысловасці (РЭП), кіраўнік якога Генадзь Фядыніч лічыць важным, каб у людзей была магчымасць паўдзельнічаць у дыскусіі і пачуць развагі асобы, якая фактычна з'яўлялася кіраўніком нашай дзяржавы пасля абвяшчэння незалежнасці Беларусі.

Зразумела, што падчас сустрэчы шмат пытанняў да Станіслава Шушкевіча тычыліся не толькі тых момантаў і часу жыцця, якія апісаны ў кнізе, але падзей сённяшняга дня. Размова ішла пра сітуацыю ў Расіі і Украіне, а таксама пра магчымыя сцэнарыі развіцця Беларусі ў палітычным і эканамічным рэчышчы, перспектывах будаўніцтва атамнай электрастанцыі ў Гродзенскай вобласці і шмат пра што іншае.