Вілейскія бібліятэкары стварылі лепшыя буктрэйлеры

Фота з сайта vk.com

Бібліятэкары з Вілейшчыны вызначыліся ў абласным конкурсе на лепшы праект па папулярызацыі беларускай кнігі сродкамі сучасных інфармацыйных тэхналогій, які аб’явіла Упраўленне культуры Мінаблвыканкама.

На конкурс прадставілі 45 праектаў.

Першае месца ў намінацыі “Лепшы праект па папулярызацыі беларускай мастацкай літаратуры” заняла бібліятэкар Ізбіноўскай сельскай бібліятэкі Іна Лазар. Яна стварыла буктрэйлер па кнізе Уладзіміра Караткевіча “Лятучы Галандзец”.

Другое месца ў гэтай намінацыі заняла бібліятэкар аддзела бібліятэчнага маркетынгу Вілейскай раённай цэнтральнай бібліятэкі Аксана Дубяга.

Для ўдзелу яны выбрала творчасць мясцовага аўтара Івана Лашуткі і стварыла буктрэйлер “Край верасовы”.

– Мне гэты паэт цікавы як асоба і захацелася, паказаць у конкурсе творчасць нашага аўтара, –тлумачыць Аксана Дубяга. – Да таго ж летась адзначалася 80-годдзе з дня нараджэння Івана Лашуткі. У відэарадзе можна пабачыць знакавыя мясціны: школа, дзе працаваў творца, памятны знак Івану Лашутку і іншыя. А да іх далучылася песня на верш вілейскага паэта “Край мой верасовы”, музыку да якой напісаў Аляксандр Высоцкі, у выкананні Сяргея Герасімава.

Гэты буктрэйлер ужо выкарыстоўвалі на розных мерапрыемствах, праводзімых у памяць Івана Лашуткі.  

 

Даведка “РГ”

Буктрэйлер – кароткі (на 2-3 хвіліны) відэаролік, які расказвае пра кнігу. Мэта такіх ролікаў – прыцягненне ўвагі да твору пры дапамозе візуальных сродкаў.