Сёння ўшаноўваюць мастачку Ядвігу Раздзялоўскую (+унікальныя фота)

Источник материала:

05.03.2012 — Новости Культуры

Сёння адбудзецца вечар памяці ў гонар мастачкі Ядвігі Раздзялоўскай. Пачатак а 17 гадзіне ў малой зале Палаца культуры, паведаміў арганізатар імпрэзы Юрый Церабун. Гледачы ўбачаць фільм пра мастачку, які рыхтавалі пяць гадоў, і слайд-шоу яе карцін.

Пра Ядвігу Раздзялоўскую у кнізе ўспамінаў узгадвае яе сябар мастак Кастусь Харашэвіч.

“Неўзабаве пазнаёміўся з мастачкай Ядвігай Іосіфаўнай Раздзялоўскай, якая раней прыехала ў Маладзечна з Баранавіч на месца працы свайго мужа.

Няпроста склалася жыццё гэтай таленавітай асобы. Ураджэнка Польшчы. Да 1939 года скончыла мастацкую вучэльню ў Варшаве. Выйшла замуж за беларуса. Калі немцы напалі на Польшчу, Раздзялоўскія заснаваліся ў Баранавічах, дзе і перажылі акупацыю.

Ядвіга Іосіфаўна была адукаваным, інтэлігентным чалавекам. Любіла сваю Радзіму. З пашанай адносілася і да Беларусі, яе культуры і мастацтва. Была выдатным жывапісцам, майстрам партрэта і нацюрморта. Але заўчасна памёр яе муж. Дзяцей не было, і яна засталася жыць у нашым горадзе. Хапіла ў яе мужнасці пражыць пасля смерці мужа яшчэ больш за 30 год. Асабовая выстава ў Мінску да 80-годдзя паказала, як многа зрабіла яна для беларускага выяўленчага мастацтва. Было б цалкам справядліва прысвоіць ёй званне заслужанага дзеяча мастацтваў Рэспублікі. Але рэтраграды ў Саюзе мастакоў на чале з тагачасным старшынёй праўлення Уладзімірам Гардзіенкам адмовілі ў гэтым на той падставе, што мастачка польскага паходжання.

А вось на сваёй Радзіме да Ядвігі Іосіфаўны аднесліся па-іншаму. Калі яна зрабіла пазней асабовую выставу ў Варшаве і пакінула там частку сваіх твораў, то атрымала званне заслужанага дзеяча Польскай Народнай Рэспублікі.

Памерла Ядвіга Раздзялоўская ў 1992 годзе, пражыўшы 90 год. Пахаваная на маладзечанскіх гарадскіх могілках разам з магілай свайго мужа. Але гэта было пазней.

У той час, калі я з ёй пазнаёміўся, яна была энергічным, цалкам адданай мастацтву творцам. Я прапанаваў ёй арганізаваць пры студыі дэкаратыўна-прыкладное аддзяленне. Гэта дазволіла пашырыць дыяпазон навучання і павялічыць колькасць навучэнцаў. Пра нашу студыю загаварылі ўжо і ў сталіцы. Сталі наведвацца метадысты пераймаць вопыт. Па сённяшні дзень успамінаюць былыя студыйцы тыя часы.

У 1961 годзе ў сааўтарстве з Ядвігай Іосіфаўнай, якая ў той час была членам Саюза мастакоў Беларусі, па дагаворы з Міністэрствам культуры для краязнаўчага музея была створаная карціна на тэму ўз’яднання Заходняй Беларусі з Усходняй. Называлася яна “Маладзечна. 17 верасня 1939 года”.

З кнігі Кастуся ХАРАШЭВІЧА “Зведанае і перажытае”.

Ядвіга Раздзялоўская − мастачка, ураджэнка Польшчы. Нарадзілася 1 сакавіка 1902. Дзявочае прозвішча Лясьеўская. Жыла і працавала ў Маладзечне. Памерла ў 1992 годзе, пражыўшы 90 год. Стала сябрам Саюза мастакоў Беларусі. Заслужаны дзеяч Польскай Народнай Рэспублікі.

Творы Ядвігі Раздзялоўскай.