У Баранавічах адкрылася мастацкая выстава беларускай народнай творчасці

З 16 верасня ў Выставачнай зале распачала працу выстава “Крыніцы натхнення“ Беларускага саюза мастакоў народнай творчасці.

На выставе прадстаўлена 150 экспанатаў 50 аўтараў з усёй Беларусі. Усе працы ўражваюць сваёю прыгажосцю і адметнасцю.



Выкананы яны не толькі прафесійнымі мастакамі, але таксама і звычайнымі людзьмі, якія займаюцца народнымі рамёствамі.



Тут можна пабачыць усю разнастайнасць галінаў традыцыйнага беларускага народнага рамяства: ганчарства, кавальства, выцінанкі, маляванкі, саломапляценне, лозапляценне, роспісы па тканіне і шкле і г.д.





Да таго ж наведвальнікі ўбачыць вязаныя лялькі, з якімі гулялі нашы бабулі, лялькі ў нацыянальных касцюмах, карціны са скуры, бяросты, саломкі.





Есць сапраўдныя дзіцячыя і дарослыя валёнкі, упрыгожаныя арнаментам. Пры выкананні такіх работ кожны мастак укладае ў іх частку сваёй душы, і, здаецца, усе экспанаты напоўнены цяплом і пазітывам.





Выстава працягнецца да 15 лістапада 2011 года.