Лунай, наша песня
Упершыню г. Маладзечна прыняў рэспубліканскі фестываль беларускай песні і паэзіі ў 1993 годзе, а сёлета яго «тытульны ліст» пазначаны лічбай ХІ — столькі разоў збіраліся разам спевакі, музыкі, літаратары, каб выявіць і прадэманстраваць лепшыя творчыя здольнасці, далучыць да эстэтыкі сцэнічных жанраў нашых суайчыннікаў.
Аб адметнасцях сёлетняга песеннага фэсту гаварылі на прэс-канферэнцыі ў Мінскім аблвыканкаме яго арганізатары — намеснік старшыні аблвыканкама Віктар Шчэцька, народны артыст Беларусі старшыня журы фестывалю Міхаіл Фінберг, намеснік міністра культуры рэспублікі Уладзімір Карачэўскі, начальнік упраўлення культуры аблвыканкама Анатоль Акушэвіч.
Нагадаем, першая дзея свята пачнецца ў пятніцу, 26 жніўня, з конкурсу маладых выканаўцаў «Прысвячэнне У. Мулявіну», прадоўжыцца спектаклем Мінскага абласнога драматычнага тэатра, канцэртам з удзелам рок-выканаўцаў і рок-гуртоў у Летнім амфітэатры горада, пабудова якога завершана зусім нядаўна.
Самым насычаным абяцае быць суботні дзень, дзе на розных творчых пляцоўках горада і раёна пройдуць канцэрты, паэтычныя чытанні, у тым ліку ў філіялах дзяржаўных музеяў — Я. Купалы ў Вязынцы і М. Багдановіча ў Ракуцёўшчыне. А вечарам гледачоў чакае вялікі гала-канцэрт — адкрыццё ХІ Нацыянальнага фестывалю беларускай песні і паэзіі з уручэннем узнагарод і прызоў пераможцам конкурсу маладых выканаўцаў.
У нядзелю Палац культуры Маладзечна запросіць на канцэрт «Чатыры нацыянальныя постаці Беларусі» з удзелам камерных калектываў Нацыянальнага акадэмічнага аркестра сімфанічнай і эстраднай музыкі і заслужанага аматарскага калектыву сімфанічнага аркестра Маладзечанскага музычнага вучылішча імя М.К.Агінскага, іншыя цікавыя імпрэзы.
У дні фестывалю будзе арганізаваны «Горад майстроў», дзе свае вырабы прадставяць майстры народных рамёстваў і дэкаратыўна-прыкладнога мастацтва Маладзечанскага, Вілейскага, Мядзельскага і Валожынскага раёнаў. На Цэнтральнай плошчы горада выступяць аматарскія калектывы Маладзечанскага раёна і гарадоў-пабрацімаў.
Удзельнікам і гасцям фестывалю «Маладзечна-2011» накіраваў сваё прывітанне старшыня Мінскага аблвыканкама Барыс Батура.