У Беларусі выступіць шведскі камерны хор

3-4 чэрвеня ў Мінску і Полацку выступіць шведскі камерны хор Святога Юханэса. Імпрэза адбудзецца ў межах традыцыйных Дзён культуры Швецыі ў Беларусі, што адкрыліся 12 траўня.

Камерны хор Cвятога Юханэса, удзельнікі якога жывуць у прыходзе Святога Юханэса ў Стакгольме, быў заснаваны ў 2002 годзе.

У сваёй творчай дзейнасці ён не абмяжоўваецца нейкім адным стылем ці жанрам. Таму за шэсць гадоў існавання хор можа пахваліцца даволі шырокім і разнастайным спектрам выканання, пачынаючы з класічных араторыяў і традыцыйнай акапельнай музыкі і да перформансаў і сцэнічных пастановак. Сярод тых, з кім супрацоўнічаў хор, можна ўзгадаць арт-дуэт Лісэ і Гетруда, саксафаніста Андэша Паўлсана, Готландскую школу кампазітараў, сімфанічны аркестр “Про Музыка”, Драматычны інстытут, а таксама спевакоў Еспера Тоба, Мікаэля Беліні і Маргарэту Бенгтсан.

На сцэне ў пастаноўцы сцэнічнай араторыі Карла Унандэр-Шарына “Дзея апостала” хор Святога Юханэса супрацоўнічаў з оперным рэжысёрам Хеленай Рор і харэографам Кларай Нілéн.

У 2008 годзе хор узяў удзел Міжнародным конкурсе імя Флейшмана ў ірландскім Корку, дзе быў уганараваны другой прэміяй.

“Усё, што мы робім, мы робім якасна, і таму з вялікай ахвотай бярэмся за разнастайныя музычныя авантуры і заўсёды займаемся новымі цікавымі праектамі!” – сцвярджаюць удзельнікі хору Святога Юханэса.



У Мінску і Полацку камерны хор Святога Юханэса выступіць разам з мінскім хорам Concordia.

Мінск

3 чэрвеня, 19.00. Малая зала Белдзяржфілармоніі (пр. Незалежнасці, 50).

З 2 чэрвеня квіткі можна набыць у касе Белдзяржфілармоніі (пр. Незалежнасці, 50). У іншыя дні звяртацца па тэлефоне +375 29 620 23 30 (Таццяна).

Полацк

4 чэрвеня, 17.00. Канцэртная зала Полацкай Сафіі (вул. Замкавая, 1). Уваход вольны.