У Гродна адкрылася выстаўка "Лялька Гродзеншчыны"

У Гродна адкрылася выстаўка "Лялька Гродзеншчыны"

"Лялька Гродзеншчыны" – выстаўка пад такой назвай працуе ў Музеі сучаснага народнага і самадзейнага мастацтва пры абласным метадычным цэнтры народнай творчасці. 

Лялька заўсёды займала адно з галоўных месцаў у традыцыйнай бытавой і матэрыяльнай культуры беларусаў. Яна мела сваё сэнсавае значэнне і выконвала абрадава-рытуальную, гульнёвую, эстэтычную і выхаваўчую функцыі.

Амаль кожны з нас звязвае свае ўспаміны аб дзяцінстве менавіта з лялькай. Саламяныя, драўляныя, керамічныя, пластыкавыя, тэкстыльныя – лялькі ўвасаблялі ў сабе рысы нашых продкаў, казачных герояў, жывёл,  гістарычных персанажаў. З ёй і зараз з задавальненнем бавяцца дзеці, працуюць на сцэне самадзейныя і прафесійныя артысты. Лялькі выкарыстоўваюцца ў абрадавых дзеях, аздабленні інтэр’ераў, мэблі. Усё гэта адлюстравана ў экспазіцыі, якая разлічана як на дарослых, так і дзяцей.

У выстаўцы прымаюць удзел 45 майстроў лялькі з усіх куткоў Гродзеншчыны. Саламяныя – прадстаўлены майстрамі Навагрудскага і Іўеўскага раёнаў, проста заварожваюць сваёй прыгажосцю, дасканаласцю формы, тэхнікай выканання.

Разнастайнасцю матэрыялаў, выкарыстаных для вырабу лялек, адрозніваюцца экспанаты, выстаўленыя майстрамі творчага аўтарскага калектыву з Роскага раённага цэнтра рамёстваў Ваўкавыскага раёна.

Сярод удзельнікаў выстаўкі звяртаюць на сябе ўвагу цацкі для дзяцей, вырабленыя ўдзельнікамі гурткоў Цэнтра творчасці дзяцей і моладзі "Прамень" Кастрычніцкага раёна горада Гродна і Смаргонскага раённага цэнтра творчасці дзяцей і моладзі.

Запрашаем усіх гродзенцаў наведаць выстаўку і тым самым яшчэ раз дакрануцца да непаўторных вобразаў гродзенскай лялькі. Убачыўшы экспазіцыю, наведвальнікі яшчэ раз пераканаюцца, што лялька ніколі не знікне з чалавечага жыцця.