Кустурыца не будзе здымаць фільм пра Лукашэнку

«Не ўпэўнены, што здолеў бы зрабіць фільм пра Аляксандра Лукашэнку», — заявіў сербскі рэжысёр Эмір Кустурыца, адказваючы на пытанні журналістаў на прэс-канферэнцыі 10 лістапада ў Мінску.

Паводле слоў Кустурыцы, для стварэння карціны звычайна яму неабходна адчуваць «аснову, на якой можна зрабіць фільм». «Я ўсё яшчэ пад уладай Дастаеўскага, — сказаў ён. — І фільм пра Дастаеўскага быў бы сучасным фільмам аб тым, як пакараны тыя, хто любіць Дастаеўскага».

«Спадзяюся, што я знайду жаданне і разуменне і ў Расіі, і ў Беларусі для стварэння гэтага фільма», — дадаў ён.

Паводле слоў рэжысёра, карціна складаецца з трох гісторый. Першая з іх прысвечана маладому аўтару, які хоча зняць фільм пра Дастаеўскага. Ён звяртаецца па фінансавую падтрымку да багатага чалавека, але той згаджаецца дапамагчы толькі пры ўмове, што малады чалавек заб’е яго жонку. Другая гісторыя расказвае пра дзяўчыну з Бялграда, якая іграе Настассю Філіпаўну (гераіня рамана Дастаеўскага «Ідыёт»). Аднойчы яна вырашае, што павінна зацяжарыць ад унука Дастаеўскага. Дзяўчына прыязджае да яго ў Санкт-Пецярбург і расказвае аб сваім жаданні. Трэцяя прыпавесць — аб тым, дзе цяпер знаходзіцца Іван Карамазаў. Ён стаў манахам, але аднойчы сустракае дзяўчыну, якая хоча нарадзіць дзіця ад унука Дастаеўскага. Чым скончылася гэтая гісторыя, Кустурыца не расказаў.

«Я вырас на старых рускіх фільмах, — адзначыў ён.

— На карцінах Даўжэнкі я вывучыў кампазіцыю фільма, і самае галоўнае — гледзячы яго фільмы, я навучыўся ствараць метафару. Бо мастацтва адрозніваецца ад не-мастацтва тым, што мастацтва ўмее правесці метафару». Паводле слоў Кустурыцы, руская літаратура — Гогаль, Лермантаў, Булгакаў, Талстой, Дастаеўскі — дапамагла яму «ўбачыць святло і атрымаць адукацыю». Кінарэжысёр дадаў, што нядаўна прэзентаваў у Бялградзе ўласную кнігу, якая, магчыма, будзе перакладзена на рускую мову.

Кустурыца таксама заявіў, што бачыць чалавечую свабоду як рускі філосаф Бярдзяеў — «свабода цяжкая, а рабства лёгкае».