МIХАIЛ АНДРЭЕВIЧ САВIЦКI

МIХАIЛ АНДРЭЕВIЧ САВIЦКI

8 лiстапада на 89–м годзе жыцця перастала бiцца сэрца Героя Беларусi, народнага мастака СССР, народнага мастака Беларусi, лаўрэата Дзяржаўных прэмiй СССР i Рэспублiкi Беларусь, акадэмiка, ветэрана Вялiкай Айчыннай вайны, ганаровага грамадзянiна г. Мiнска Мiхаiла Андрэевiча Савiцкага.

М.А.Савiцкi нарадзiўся 18 лютага 1922 года ў вёсцы Звянячы Талачынскага раёна Вiцебскай вобласцi. Пасля заканчэння сярэдняй школы ў 1940 годзе быў прызваны ў рады Чырвонай Армii. Дваццацiгадовы юнак, салдат Чырвонай Армii, якi змагаўся ў баях за горад Севастопаль i быў паранены на Херсанесе, апынуўся ў канцлагерах Бухенвальд, Дахау, Мiтэльбау, Дора, дзе цалкам падзялiў трагедыю народаў Еўропы, але ж цудам застаўся ў жывых.

Пасля вайны М.А.Савiцкi скончыў Мiнскае мастацкае вучылiшча, у 1957 годзе — Маскоўскi мастацкi iнстытут iмя Сурыкава з адзнакай, пасля чаго жыў i працаваў у Мiнску. З 1981 года з’яўляўся кiраўнiком Творчых акадэмiчных майстэрань жывапiсу, графiкi i скульптуры.

М.А.Савiцкiм было створана больш за 200 тэматычных работ, у якiх ён развiваў традыцыi рэалiстычнага мастацтва. Вызначальным стрыжнем творчых пошукаў М.А.Савiцкага з’яўляўся Чалавек, яго светаразуменне, маральная сутнасць, характар у складаным дыялектычным развiццi. Аптымiст i жыццялюб, М.А.Савiцкi на працягу ўсёй сваёй творчасцi самааддана адстойваў сваiм майстэрствам гуманiстычныя iдэалы.

Творчасць М.А.Савiцкага вызначаецца глыбокiм пранiкненнем у сутнасць з’яў мiнулага i сучаснага, фiласофскiм iх асэнсаваннем, сцвярджэннем вечных духоўных каштоўнасцей чалавецтва. М.А.Савiцкi з’яўляецца аўтарам шырока вядомых жывапiсных твораў, прысвечаных гераiчнай партызанскай барацьбе супраць гiтлераўскiх захопнiкаў: «Партызаны», «Партызанская мадонна», «Вiцебскiя вароты», «Поле», «Плач па загiнуўшых героях», а таксама цыкла з 16 карцiн «Лiчбы на сэрцы» i трыпцiха «Агрэсiя», прасякнутых антыфашысцкiм пафасам i публiцыстычнасцю. Шмат карцiн прысвечана тэме гiсторыi станаўлення беларускай нацыянальнай культуры: «Сейбiты», «Вiленскiя сустрэчы»; цыкл палотнаў для Дзяржаўнага лiтаратурнага музея Я.Купалы ў Мiнску.

М.А.Савiцкi быў узнагароджаны ордэнам «Знак Пашаны» (1967), ордэнам Працоўнага Чырвонага Сцяга (1972), ордэнам Ленiна (1982), ордэнам Францыска Скарыны (1997).

М.А.Савiцкi быў выбраны правадзейным членам Акадэмii мастацтваў СССР (1982), Нацыянальнай акадэмii навук Беларусi (1995), Мiжнароднай Славянскай Акадэмii (1996), Мiжнароднай Акадэмii навук (2002).

Светлае iмя Мiхаiла Андрэевiча Савiцкага назаўсёды захаваецца ў гiсторыi беларускага мастацтва, сэрцах яго вучняў, калег па працы, родных i блiзкiх, памяцi ўсяго беларускага народа.

ЛУКАШЭНКА А.Р., СIДОРСКI С.С., РУБIНАЎ А.М., АНДРЭЙЧАНКА У.П., МАКЕЙ У.У., ПАТУПЧЫК У.М., ЛАТУШКА П.П., ЛАДУЦЬКА М.А., МЯСНIКОВIЧ М.У., НОВIКАЎ А.М., БАРАЗНА М.Р., ВАШЧАНКА Г.Х., ГУМIЛЕЎСКI Л.М., ПАПЛАЎСКI Г.Г., СТАЛЬМАШОНАК У.I., САВIЧ У.П., МIСКО I.Я., ПРАКАПЦОЎ У.I.