Пафарбаванае мінулае Магілёва

У абласным цэнтры прэзентавалі праект "Магілёў: з мінулага ў сучаснасць". 

Гэта набор з 24-х дарэвалюцыйных паштовак з відамі і архітэктурнымі помнікамі Магілёва губернскага. Пры гэтым старыя відарысы пафарбаваныя ў розныя колеры, падобна як нядаўна зрабілі з вядомай кінастужкай "Сямнаццаць імгненняў вясны".

Прэзентацыю арганізавалі ў магілёўскім кінатэатры "Космас". Удзельнікі праекта - журналіст Алесь Асіпцоў, фотамастак Аляксандр Ліцін, калекцыянер Вячаслаў Філінаў - расказалі шмат цікавых рэчаў пра старадаўнія паштоўкі і фотаздымкі. Напрыклад, да рэвалюцыі было выдадзена 650 магілёўскіх паштовак, у асноўным з архітэктурнымі славутасцямі горада. Але з іх толькі адна была каляровая: адсюль і ўзнікла ідэя расфарбаваць на камп'ютары чорна-белыя відарысы, зрабіць нібыта ілюзію явы.

Гэта падалося стваральнікам тым больш важным, што многія са старажытных будынкаў старога Магілёва ўжо не існуюць у горадзе сучасным. Пра іх гісторыю можна прачытаць на кожнай паштоўцы: кароткі тэкст, просты і выразны, падрыхтаваў гісторык, выкладчык Магілёўскага дзяржаўнага ўніверсітэта Аляксандр Агееў.

Напрыклад, Уваскрасенская царква і гатэль "Францыя". Як сведчыць гістарычная даведка, царква раней была касцёлам, які ўзвялі іезуіты ў канцы XVІІ - пачатку XVІІІ стагоддзя. Велічны будынак у стылі барока праз сотню гадоў перадалі праваслаўным вернікам, якія паставілі на ім купал. Храм быў пашкоджаны ў гады Вялікай Айчыннай вайны і канчаткова знішчаны ў 50-ыя гады мінулага стагоддзя.

Гатэль "Францыя" калісьці ўпрыгожваў Тэатральную плошчу ў цэнтры Магілёва. Экіпажы, дамы ў вытанчаных капялюшыках і галантныя кавалеры, якія пад'язджалі ў гатэль, засталіся ў мінулым. За савецкім часам там знаходзіўся ваенкамат, а потым гатэль знеслі (у 1970-ыя гады). Так што абодва помнікі архітэктуры на гэтай паштоўцы ўжо не існуюць.

Вуліца Дваранская цяпер называецца Камсамольскай. На пярэднім плане - Дом дваранства, за ім - яўрэйскае медыка-санітарнае таварыства. Забудова гэтай вуліцы - тыповая для тагачаснага Магілёва. У мураваных будынках у некалькі паверхаў першыя займалі крамы, на другіх жылі гаспадары альбо здаваліся апартаменты. Па такіх магілёўскіх вуліцах у розныя часы гулялі Гаўрыла Дзяржавін, Аляксандр Пушкін, Тарас Шаўчэнка, Мікалай Гогаль, Сяргей Ясенін. З усіх будынкаў на вуліцы Дваранскай, якія ёсць на паштоўцы, ХХ стагоддзе перажыў толькі адзін.

Набор паштовак зроблены ў выдавецтве "АмеліяПрынт". Упершыню друкаваны гістарычны праект падтрымала прыватнае прадпрыемства і рызыкнула сваімі, а не дзяржаўнымі грашыма.

- Мы выпусцілі пробны тыраж у 500 набораў паштовак, - гаворыць кіраўнік выдавецтва Аляксандр Емяльянаў. - Хваляваліся, праўда, але адразу адчулі - інтарэс ёсць.

Усе надпісы і тэксты на паштоўках выкананы толькі на беларускай мове. Каб набор быў цікавы для турыстаў, распаўсюджвальнікі папрасілі "АмеліюПрынт" вырабіць дадатковы ліст з тлумачэннем на рускай і англійскай мовах. Наборы з такім дадаткам паступяць у продаж у верасні. Цяпер жа ў Магілёве цалкам беларускамоўныя паштоўкі "Магілёў: з мінулага ў сучаснасць" можна набыць за 9 тысяч рублёў.

Першая магілёўская паштоўка з'явілася ў 1902 годзе. Праз сто гадоў як сродак сувязі яна практычна знікла. Але новае выданне старых паштовак дапаможа цяперашнім магілёўцам не проста параўнаць Магілёў сто гадоў таму і сёння, але і адчуць сапраўдную сувязь часоў.