Беларускае караоке TUT. Песня сумлення на верш Пімена Панчанкі

Пімен Панчанка. Малюнак Лявона Вольскага

Песняй “Мала сказаць: “Ненавіджу”…” на верш Пімена Панчанкі беларускі партал TUT.BY, а таксама музыка і аўтар праекту “Белая яблыня грому” Лявон Вольскі працягваюць супольны праект “Беларускае караоке TUT”. Гэта ўжо шостая прем’ера песні са складанкі, пятая песня-магчымасць упісаць сваё імя ў музычна-паэтычную гісторыю Беларусі для кожнага карыстальніка байнэта.

Гэтай магчымасцю ўжо скарысталіся дзясяткі наведвальнікаў TUT.BY, якія спампавалі арыгінальныя кампазіцыі з альбому, а таксама адпаведныя мінусоўкі, пад якія запісалі свае версіі апублікаваных песень на спадручныя прылады з мікрафонамі (ноўтбукі, лічбавыя дыктафоны, мабільныя тэлефоны і г.д.) і даслалі іх на адрас spievy@tut.by.

Праз сённяшнюю кампазіцыю ўпісаць сваё імя ў гісторыю можаце і вы. Для гэтага адкажыце правільна на пытанне, змешчанае ўнізе.

Пампуйце арыгінальную кампазіцыю ў выкананні Лявона Вольскага са складанкі “Белая яблыня грому”.

Паслухаць арыгінал


Вучыце ці раздрукоўвайце сабе тэкст песні:

Мала сказаць: ненавіджу,
Мала сказаць: прызнаю.
Біцца за праўду – і выжыць,
Нібы салдат у баю.

Дрэннаму – не пакарыцца,
Добрае – не празяваць,
З дробнай хлуснёй не мірыцца,
З буйнай хлуснёй ваяваць.

Гэтым бы і кіравацца…
Толькі і зло, і хлусня
Хітра маскіравацца
Вучацца спрытна штодня.

Нехта і подлы, і хіжы
Клятву паўторыць тваю:
З ворагам біцца – і выжыць,
Нібы салдат у баю.

Ну і канешне ж “мінусоўка” для вашых вакальных трэніровак і зорных прэзентацыяў.

Паслухаць "мінус"

Спампаваць "мінус" >>>

Пра гэтую песню Лявон Вольскі сказаў, досыць сцісла, але, як заўжды, па справе:

“Сумленны верш Пімена Панчанкі. Шчырыя словы. Цікава, што ўсё сказанае паэтам у далёкія 70-я гады мінулага стагоддзя, вельмі актуальна і цяпер, і словы набылі новы, сучасны, сэнс і кантэкст”.

А ці не да гэтых апетых Панчанкам ідэалаў і каштоўнасцей мы звяртаемся ўсё часцей акурат прыканцы першай травеньскай дэкады, якая мае для Беларусі свой асаблівы сэнс.

Дадамо, што ў межах прэзентацыяў праекту “Белая яблыня грому” і “Беларускае караоке TUT” на партале TUT.BY ужо прайшлі прэзентацыі песень “Пахне чабор” (на верш Петруся Броўкі), “Гэй, наперад!” (на верш Янкі Купалы), “Парушыўшы законы прыцягнення” (на верш Аркадзя Куляшова), "Вецер Радзімы" (на верш Максіма Танка).