Беларускае караоке TUT. Адарвіся ад зямлі і заспявай

Аркадзь Куляшоў. Малюнак Лявона Вольскага

У пярэдадзень светлага Вялікадня беларускі партал TUT.BY і аўтар праекту “Белая яблыня грому” Лявон Вольскі прэзентуюць чарговую песня з плыткі і прапануюць заспяваць яе па-свойму. Сёння мы прапануем вашай увазе песню “Парушыўшы законы прыцягнення” на верш Аркадзя Куляшова.

Да музычнага ўвасаблення новага прачытання беларускага класіка аўтар “Белай яблыні грому” Лявон Вольскі прыцягнуў сваю жонку Ганну Вольскую. Фактычна гэта запрашэнне і да ўсіх нас прыцягваць да запісаў уласных версій свае другія паловы.

Таму слухайце арыгінальную кампазіцыю,






запісвайце сабе “мінусоўку”, а на яе і свае версіі песні (для гэтага трэба дастаткова мець пад рукамі ноўтбук з мікрафонам, мабільны з дыктафонам ці проста лічбавы дыктафон, хопіць нават дыктафонаў на відэа ці фотакамерах). Гатовыя варыянты дасылайце на адрас spievy@tut.by.

Памятайце! Кожны, хто дашле свой варыянт песень з праекту “Белая яблыня грому”, стане суаўтарам і выканаўцам народнай версіі праекту, якая пабачыць свет сёлетняй восенню. Не ўпусці шанец трапіць у музычна-паэтычную гісторыю краіны!

Нагадаем, што ўжо былі публікаваныя арыгіналы і “мінусы” для вашага выканання песень “Пахне чабор” на верш Петруся Броўкі і “Гэй, наперед” на верш Янкі Купалы. Канцэртная прэзентацыя праекту “Белая яблыня грому” адбылася 23 сакавіка ў тэатры Янкі Купалы. У эфіры беларускага парталу TUT.BY Лявон Вольскі распавёў, як прыдумаў праект і што хацеў ім сказаць.

Парушыўшы законы прыцягнення

Парушыўшы законы прыцягнення,
Планетамі сярод другіх планет
Існуем мы з табой як выключэнне,
Мая любоў, – як свет і антысвет.

Ніколі мы адной не ходзім сцежкай,
Не дзелім хлеб і дзелім толькі соль,
Ты сустракаеш смутак мой усмешкай
І смуцішся, калі міне мой боль.

Адказваеш на мой сардэчны захад
Нязгодай, самай крыўднаю з нязгод.
Здаецца, павярніся я на захад,
Як тут жа ты павернешся на ўсход.

Аднак зямля б мая асірацела
І ўвесь сусвет ахутала б імгла,
Каб, выбухнуўшы раптам, адляцела
Ты ў невядомасць з хуткасцю святла.

Для таго каб спампаваць арыгінальную версію песні, трэба адказаць на адно нескладанае пытанне.