Закатаць кнігу ў цэмент

Юра Шуcт. «Кніга падарожжаў» (абраныя аркушы з эскізніка).

Да 29 лістапада ў галерэі сучаснага мастацтва «Ў» (Незалежнасці, 37а) адкрылася калектыўная выстава, прысвечаная вобразу кнігі ў мастацтве, ScetchBook.

Найважнейшай кнігай для мастака па-ранейшаму ёсць скетчбук. Скетчбук — па просту «эскізнік», альбом, куды мастак робіць накіды, усё роўна, як свае нататкі і зацемкі ў дзённік піша літаратар.

За стагоддзі свайго існавання скетчбук і звычайная кніга зазналі вялікія змены: мастакі дадалі ў эскізнікі больш дзённікавых запісаў і нават аздобілі іх літаратурнымі творамі, у тый час як класічная папяровая кніга сама зрабілася аб"ектам мастацкага роздуму. Мастацтва кнігі на сённяшні дзень не абмяжоўваецца звыклым выданнем з усімі вантробамі, тэкстам і ілюстрацыямі. Цяпер мастак звяртаецца да кніжнай тэматыкі як у сучасных жанрах: выкарыстоўвае яе ў перфомансах і відэаарце, так і ў класічных формах: жывапісе, графіці і скульптуры. Гэтак кніга робіцца творам мастацтва.

«Замест таго каб друкаваць даражэнны каталог сваіх працаў аднойчы я вырашыла па-мастацку ўставіць ва ўжо надрукаваную празаічную кнігу, якая мне спадабалася, свае фоты, эскізы і зацемкі, — кажа адна з удзельніц праекту, дырэктарка варшаўскай галерэі Zoya, мастачка Зоя Луцэвіч. — Атрымалася як на мастака і адмыслова, і нядорага. Нават дзіўна, што ніхто раней да гэтага не дадумаўся. Адзіная праблема: каталог маіх працаў існуе толькі ў адзіным асобніку».

Вольга Сазыкіна «Бібліятэка ўспамінаў»(2009)

На выставе ScetchBook можна пабачыць як класічныя аркушы эскізнікаў мастака Юры Шуста, які стала жыве ў Італіі, з яго замалёўкамі еўрапейскай штодзённасці, так і закатаныя ў цэмент кніжныя выданні з канцэптуальнай інсталяцыі Вольгі Сазыкінай, яе праца-роздум «Бібліятэка ўспамінаў» пра кнігу як элемент успамінаў. Побач: арыгіналы намаляваных кніг, арт-кнігі, а таксама прыватныя нататнікі мастакоў.

Спантанная выстава ScetchBook працягнецца да 29 лістапада.

Што будзе цікавага на выставе акрамя асноўнай экспазіцыі?

27.11 — Лекцыя «Кнігу як арт-аб"ект», якую правядзе адмыслова прыехалы з Швецыі перакладчык і паэт Дзмітры Плакс. Падчас лекцыі будзе прэзентаваная падзеленая на 9 частак кніга, якую, каб прачытаць трэба, каб сабраліся ўсе 9 пакупнікоў.

28.11 — Са сваімі рукапіснымі кнігамі (і вершамі) прыедуць украінскія літаратары, удзельнікі літ"абяднання «Бочка». Акцыя «Грузіце вершы бочкамі» пачнецца а 18.

29.11. — Сустрэча з суполкай «Саша&Таня», бадай адзінымі прафесійнымі майстрамі, вытворцамі самаробных аўтарскіх кніжак, зінаў. Вечар «Надрукуй сябе сам(а): вечар размоваў, выставы і кіно пра зіны» пачнецца а 20.

А таксама: прагляды слайд-шоу, прысвечаныя скетчбукам з іншых краін, музычныя праграмы.