У Беларусі і за мяжой створана 5 767 участкаў для галасавання на выбарах Прэзідэнта

У Беларусі і за мяжой створана 5 767 участкаў для галасавання па выбарах Прэзідэнта Беларусі. Такая інфармацыя размешчана на сайце ЦВК, паведамляе БЕЛТА.

У Брэсцкай вобласці створана 910 участкаў для галасавання, у Віцебскай — 750, у Гомельскай — 997, у Гродзенскай — 656, у Мінскай — 992, у Магілёўскай — 731, у Мінску — 687.

У санаторыях, прафілакторыях, дамах адпачынку, бальніцах і іншых арганізацыях аховы здароўя, якія аказваюць медыцынскую дапамогу ў стацыянарных умовах, сфарміраваны 231 участак, у воінскіх часцях — 13, за межамі Беларусі — 44.

У Беларусі да 21 чэрвеня прадаўжаецца вылучэнне кандыдатаў у члены ўчастковых выбарчых камісій. Сваіх прэтэндэнтаў могуць прапаноўваць палітычныя партыі, грамадскія аб’яднанні, працоўныя калектывы, грамадзяне. Дакументы падаюцца ў раённыя, гарадскія выканаўчыя камітэты, мясцовыя адміністрацыі.

Тэрытарыяльныя камісіі на выбарах ужо сфарміраваны. У іх складзе 1989 чалавек, 1095 з іх (55,05 працэнта) прадстаўнікі грамадскіх аб’яднанняў. Ад партый у камісіі ўключаны 152 чалавекі (7,64 працэнта), ад працоўных калектываў — 101 (5,08 працэнта), ад грамадзян, якія падалі заявы, — 641 (32,23 працэнта).