«На ўрадлівых землях «Гарадца». Рэпартаж з палёў аднайменнага сельгаспрадпрыемства

На ўзворванні задзейнічаны Юрый Леановіч і Іван Кірсанаў

У аддзяленні Красная Гара, дзе раней была шматлюдная вёска з аднайменнай назвай, напрыканцы мінулага тыдня была сканцэнтравана значаная колькасць тэхнікі КУВСП “Гарадзец”. Тут на розных участках палёў вялося ўзворванне глебы і сяўба асўсу. За рабочым працэсам сачыла вядучы спецыяліст гаспадаркі па ідэалагічнай рабоце Наталля Катушонак.
— Нягледзячы на капрызнае надвор’е, мы актыўна вядзём вясенне-палявыя работы, — кажа Наталля Віктараўна. — Сёлета і запланавана пасеяць 1415 гектараў яравых зерневых і зернебабовых культур, 189 га будзе пасеяна кукурузы на зерне і 487 гектараў — на сілос. Дадаткова яшчэ будзе пасеяны рапс і пасаджана бульба. Па стане на 20 красавіка ўжо пасеяны 941гектар зерневых і зернебабовых, што складае 66 працэнтаў ад планавага задання. У сельгаспрадпрыемстве на сяўбе задзейнічаны дзве сеялкі — АПП-6А і СПУ-6. А працуюць на іх вопытныя і вельмі адказныя механізатары — Аляксей Стрыжонак і Аляксандр Каснікоўскі. Дарэчы, Аляксандр лідзіруе па засеяных плошчах у гаспадарцы, а таксама займае трэцяе месца сярод сеяльшчыкаў у раёне. Ён ужо загарнуў у глебу насенне яравых культур на плошчы 469 гектараў.

Сеяльшчык Аляксандр Каснікоўскі атрымаў за сваю працу падарунак

Своечасовы падвоз насення да сеялак ажыццяўляюць механізатар Аляксандр Морхат і вадзіцель Сяргей Шуман.
Так як з восені не на ўсёй запланаванай плошчы было ўзнята зябліва, зараз актыўна займаемся ўзворваннем пашы. Шэсць адзінак трактараў розных марак задзейнічаны ў гэтым працэсе. Так як механізатарскіх кадраў нам не хапае, на перыяд вясенне-палявых работ дапамогу аказваюць людзі, камандзіраваныя з іншых арганізацый. Напрыклад, Аляксандр Богдзя, які працуе ў Лужкаўскім лясніцтве, на дадзены момант задзейнічаны на культывацыі глебы на трактары “Кіравец” К-744 разам з механізатарам Артурам Салькевічам. Мужчыны працуюць на энерганасычанай тэхніцы ў дзве змены. Ад прадпрыемства жыллёва-камунальнай гаспадаркі камандзіраваны Анатолій Баравік. Ён працуе на ўнясенні арганічных угнаенняў.
Хуткімі тэмпамі ішла сяўба яравога рапсу ва ўрочышчы Венсамполле. Сеяльшчыкі Аляксандр Каснікоўскі і Аляксей Стрыжонак на сваіх трактарах загортвалі насенне аўсу ў глебу. На размешчаным побач 22-гектарным полі ўзворванне пашы вялі механізатары Юрый Леановіч і Іван Кірсанаў. Мужчыны працуюць на трактарах “Беларус-82” у счэпе з плугамі з канца сакавіка. За месяц працы кожны з іх запісаў на свой рахунак не адзін дзясятак гектараў ўзараных плошчаў.
З кожным днём тэмпы вясенне-палявых работ у “Гарадцы” павялічваюцца. Урадлівыя глебы гаспадаркі восенню абавязкова аддзячаць аграрыям сваім шчодрым ураджаем.
Сяргей РАЙЧОНАК.